Farhat Ehsas
us ko hai ishq batana bhi nahin chahta hai
aur ye baat chhupana bhi nahin chahta hai
sochta rahta hai din-bhar ki miri raat men aa.e
apne din ko ye jatana bhi nahin chahta hai
sha.iri ko mira iz.har samajhta hai magar
parda-e-sher uThana bhi nahin chahta hai
saa.e ko justuju-e-jism bahut hai phir bhi
pahlu-e-jism men aana bhi nahin chahta hai
aisa lagta hai ki vo pa bhi chuka hai mujh ko
jo ba-zahir mujhe paana bhi nahin chahta hai
farhat-ehsas ko hai saari haqiqat ma.alum
mahfil-e-vahm se jaana bhi nahin chahta hai
Leave a Reply