Jameel Yusuf
go husn ki surat hain miri samt ravan bhi
ik ḳhvab si lagti hain mujhe raushaniyan bhi
kuchh apni kaho Dubte taron ko na dekho
shayad na mile phir ye nashat-e-guzaran bhi
socha tha ki luTun tiri furqat ke ḳhazine
dekha na gaya tere bichhaḌne ka saman bhi
kuchh dil bhi hai mera gham-e-ayyam se bojhal
kuchh shaam ki dahliz se uThta hai dhuan bhi
kis ajnabi rah-rav ke ta.aqub men chala hai
pa.ega na tu ret pe qadmon ke nishan bhi
karta huun kabhi chashm-e-taḳhayyul se nazara
hota hai kabhi tujh pe mohabbat ka guman bhi
tu hasil-e-manzil bhi mira rah-numa bhi
tu mujh se gurezan bhi qarib-e-rag-e-jan bhi
Leave a Reply