haidar-ali-aatish

Fart-E-Shauq Us But Ke Kuche Mein Laga Le Jaega

fart-e-shauq us but ke kuche men laga le jaega

kaba-e-maqsud tak mujh ko khuda le jaega

kaat kar par bhi mujhe sayyad be-qabu na chhod

na-tavan huun baad ka jhoka uda le jaega

rote rote jaan javegi firaq-e-yar men

ashk ka dariya mira murda baha le jaega

dil mira mutthi men rakhte ho tumhare haath se

chhin kar ik din use duzd-e-hina le jaega

misr tak pahunche na jo kanan se vo yusuf huun main

dast-e-ikhvan se chhuta to bhediya le jaega

ek gul us baagh ka bu-e-vafa rakhta nahin

sabza-e-begana shauq-e-ashna le jaega

vaada-e-sadiq to izrail se hai dekhiye

is sire se mujh ko kab tak us sira le jaega

baghban gulshan ke darvaze ko kya rakhta hai band

kaun ghunche ki kulah gul ki qaba le jaega

ustukhvan ujrat men denge ham faqir ai shah-e-husn

arzi apne shauq ki tujh tak huma le jaega

kashti-e-tan bahr-e-hasti men rahi barson tabah

paar ise ik dam men is ka nakhuda le jaega

husn dikhla dega ai but tujh men shaan allah ki

tere aage aalam apni iltija jaega

bose lega dast-e-tegh-e-qatil-e-bebak ke

‘atish’-e-maqtul apna khun-baha le jaega

More Poems

Leave a Comment