hijr ne is tarah utare rang
jaise the hi nahin hamare rang
ek manzar se ho ga.e ghayal
tum ne dekhe kahan hain saare rang
niind Thahri hui thi palkon par
rah ga.e ḳhvab ke kinare rang
naqsh ubhre tumhari nazron se
aap ki aankh ne nikhare rang
kis qadar shaan se kashid hue
kis qadar tamkanat se haare rang
surḳh joḌe ka intiḳhab kiya
laakh karte rahe ishare rang
mere angan men kya nahin maujud
ḳhushbuen titliyan sitare rang
‘roz’ ko ḳhushbuon se nisbat hai
naam se munsalik hain saare rang
Leave a Reply