bas ek hijr ke mausam ka rang gahra tha
har ek rut ko chakha tha barat ke dekha tha
us ek lamhe men kitni qayamaten TuTin
bas ek lamhe ko tere asar se nikla tha
koi charagh bhi raḳht-e-safar men rakh lete
safar men raat bhi aa.egi ye na socha tha
ḳhud apne-ap ko chhune ka hausla na raha
ki mere jism pe mera hi ḳhuun phaila tha
vo aaj mujh se mila hai to kitna banjar hai
jo apni aankh men savan ke rang rakhta tha
na us ki chhanv thi meri na phuul the mere
shajar tha sehn men apne magar paraya tha
vo sahilon pe paḌa ab ḳhala ko takta hai
jo paniyon men utarta tha siip chunta tha
aTa hai dhuul se kamra hai taaq bhi suuna
kabhi gulab saje the charagh jalta tha
Leave a Reply