itaab men jo tumhare dahan se nikle hain
vo tiir the ki sharare badan se nikle hain
fusun-e-jalva-gari ka koi asar na hua
ba-qaid-e-hosh tiri anjuman se nikle hain
koi maqam-e-aman ab nazar nahin aata
bhari bahar men sho.ale chaman se nikle hain
gham-e-hayat ne baḳhshi fasurdagi kaisi
ye aadmi hain ki murde kafan se nikle hain
na-jane kab se muqaddar thi dasht-paima.i
hazar ḳhaar mire pairahan se nikle hain
ye rang-e-sub.h-e-baharan ye apni hairani
ghazab ḳhuda ka andhere kiran se nikle hain
Leave a Reply