Be-Qanaat Qafile Hirs-O-Hawa oDhe Hue

Zafar Moradabadi

be-qana.at qafile hirs-o-hava oḌhe hue

manzilen bhi kyuun na hon phir fasla oḌhe hue

is qadar ḳhilqat magar hai maut ko fursat bahut

har bashar hai aaj ḳhud apni qaza oḌhe hue

un ke batin men mila shaitan hi masnad-nashin

jo ba-zahir the bahut nam-e-ḳhuda oḌhe hue

kya kare koi kisi se pursish-e-ahval bhi

aaj sab hain apni apni karbala oḌhe hue

kya ḳhabar kis moḌ par bikhre mata-e-ehtiyat

pattharon ke shahr men huun a.ina oḌhe hue

sab dilase us ke jhuTe us ke sab vaade fareb

kab tak aḳhir ham rahen sabr-o-raza oḌhe hue

kyuun tazabzub men na hon is daur ke ahl-e-nazar

gumrahi hai agahi ka falsafa oḌhe hue

ungliyan majruh ho ja.engi rahna duur duur

ḳhaar bhi hain in dinon gul ki rida oḌhe hue

Dhaal us ki ban ga.i hai sab balaon ke ḳhilaf

ghar se jo nikla buzurgon ki dua oḌhe hue

baḳhshishon se jis ki ḳhaas o aam sab the faiz-yab

ham bhi the us bazm men lekin ana oḌhe hue

fasl-e-gul aa.i to virane bhi mahke har taraf

aaj ḳhud ḳhushbu ko thi bad-e-saba oḌhe hue

ik zamin hi tang kya thi us se jab bichhḌe ‘zafar’

asman bhi tha ghazab-parvar ghaTa oḌhe hue