charche tire ḳhulus ke duniya men kam na the
phir bhi tire karam ke saza-var ham na the
hoga koi sharir sa jhonka nasim ka
jis ne tiri naqab uTha.i vo ham na the
muzmar thiin tere jaur men teri inayaten
tere sitam bhi teri navazish se kam na the
us raste pe chhoḌ gaya rahbar mujhe
jis raste pe aap ke naqsh-e-qadam na the
ma.asumiyat ne jiina bhi dushvar kar diya
na-karda-kar dil men kabhi itne gham na the
kuchh bojh ban chuki thiin tiri kam-nigahiyan
mahfil men intishar ka baa.is to ham na the
‘kausar’ ko baryabi ka e.azaz mil gaya
pahle hi us pe aap ke ehsan kam na the
Leave a Reply