Tariq Qamar
re.aya zulm pe jab sar uThane lagti hai
to eqtidar ki lau thartharane lagti hai
hamesha hota huun koshish men bhuul jaane ki
vo yaad aur bhi shiddat se aane lagti hai
haqir karti hai yuun bhi kabhi kabhi duniya
mire zamir ki qimat lagane lagti hai
ye raushna.i jo phaili hai tere ashkon se
ye siskiyon ki sada.en sunane lagti hai
ghurub hota hai suraj to mere siine se
ye kaisi rone ki avaz aane lagti hai
ye maslahat hai bujhane ka jab irada ho
hava diye ki kamar thapthapane lagti hai
mire dariche mire baam muskurate hain
vo jab gali se miri aane jaane lagti hai
Leave a Reply