Fard-E-Isyan Ko Wo Siyahi De

fard-e-isyāñ ko vo siyāhī de

jis kī vo zulf bhī gavāhī de

be-amāñ nīm-jāñ huuñ merī jaañ

mujh ko āġhosh-e-jāñ-panāhī de

apnī zulfoñ ke saa.e meñ mujh ko

ek shab kī sitāra-jāhī de

dil ke ujḌe nagar ko kar ābād

is Dagar ko bhī koī raahī de

maiñ ne ta.amīr qasr-e-shauq kiyā

tū ise muzhda-e-tabāhī de

baḳhshne vaale gul-ruḳhoñ ko jamāl

mujh ko sāmān-e-ḳhush-nigāhī de

maiñ asīr-e-gumān-e-zulmat huuñ

etamād-e-sahar-e-nigāhī de

mujrim-e-ishq huuñ mujhe ‘sahbā’

jo sazā de vo be-gunāhī de

Leave a Comment