ahmad-javed

Husn Najat-Dahinda Hai

sirf husn

haan. sirf husn najat-dahinda hai

ankhon ka

jo ghatiya pinjron men qaid hai

aur maamuli manazir men mahbus

kisi gali-sadi la-yaniyat ki tarah najis

kisi bhule hue lafz ki tarah aseb-zada

kyuun nahin buujh leti aulad-e-adam

ki khul jaega saara chhupao

ek haibatnak khali thahrao men

jo ek saffak bedari se mohr-band hai

ek madfun parvaz ki tarah

ek hunut-shuda ufuq ki tarah

bil-akhir hasti ki zad-bum par dhund chha gai

ab cockroach gharat-gar fateh hain

us kaenat ke jahan vaqt abhi ajnabi nahin hua

un ki saltanat men tarikh mamnua hai

zamane par kharash Dalti khar-dar tughyani

havadis se pare chalti hui

takra rahi hai qadim chattanon se

ek bahut hi siyah raat ke sahme hue sitare

ek pur-haul faza men saans leti khamoshi

jise ham khvab karna chahte hain

khvab jauhar hain asiil niind ka

insani ankhon ka

hamare sayyare

aur hamare zamane itne khallaq nahin hain

ki bana saken ek sachchi raat

jo sahar sake

abdiyat se tarashi hui vo tahdar gahrai

jis se takhayyul ka qimash buna gaya hai

yaqinan hamen ek niind ki zarurat hai

kisi asatiri sitare ka dabiz ka hi saaya

ghaibi dhundalke ko sanvarta ujalta

ek dil, ek zakhm—- bana sakte hain dekhe ko an-dekha

dard kafil hai ruuh ka

lafz ki bulughat tak shole ki pukhtagi tak

More Poems

Leave a Comment