Iftikhar Naseem
gire hain lafz varaq pe lahu lahu ho kar
mahaz-e-zist se lauTa huun suraḳh-ru ho kar
usi ki diid ko ab raat din taḌapte hain
ki jis se baat na ki ham ne du-badu ho kar
bujha charagh hai dil ka vagarna kaise mujhe
nazar na aa.ega vo mere chaar su ho kar
ham apne aap hi mujrim hain apne munsif bhi
ḳhud e’tiraf karen apne ru-ba-ru ho kar
us ek ḳhvahish-e-dil ka pata chala na use
jo darmiyan men rahi sirf guftugu ho kar
main sab men rahte hue kis tarah bhula.un tujhe
har ek shaḳhs hi milta hai mujh ko tu ho kar
ab us ke samne jaate hue bhi Darta huun
bhula diya tha jise mahv-e-justuju ho kar
hui na jazb zamin men to raat ki barish
faza men phail ga.i ḳhaak rang-o-bu ho kar
miTa jo aankh ke shishon se us ka aks ‘nasim’
ragon men phail gaya ḳhuun ki aarzu ho kar
Leave a Reply