ankhon men mire gham ki tasvir sanjo loge
ye baat na sochi thi daman ko bhigo loge
tum tark-e-ta.alluq ko kyuun chehre pe likh laa.e
tum ne to kaha ye tha ye raaz na khologe
jab mera pata tum se puchhenge gali vaale
kuchh kah to na paoge palkon ko bhigo loge
sach-much ye batao tum kya mujh se bichhaḌ kar bhi
in hijr ki raton men aram se so loge
is bhiiḌ men logon ki main ro bhi nahin sakta
ik tum ho ki chupke se tanha.i men ro loge
ye kaun hai jo ‘ishrat’ hai mere ta.aqub men
itni baḌi duniya men kis kis ko TaTologe
Leave a Reply