vida.a saath tumhare hi ho gaya suraj
phir us ke ba.ad na ham ko kahin mila suraj
kahin ubhar na saka roz-o-shab ki mahfil men
main din ka chand raha aur raat ka suraj
uThe jo ham se giran-gosh to hua ma.alum
hamen pukar ke kab ka chala gaya suraj
milan ki shaam sahi par milan nasib kahan
to chaḌhte chand ki mayyat men Dubta suraj
us ek shaam ko jis ke liye the chashm-ba-rah
ḳhilaf-e-vaqt baḌi der se Dhala suraj
‘musavvir’ aao usi sho.ala-ruḳh ki samt chalen
suna hai Dhalta nahin us ke baam ka suraj
Leave a Reply