rahat-e-vasl bina hijr ki shiddat ke baghair
zindagi kaise basar hogi mohabbat ke baghair
ab ke ye soch ke bimar paḌe hain ki hamen
Thiik hona hi nahin teri ayadat ke baghair
ishq ke maron ko adab kahan aate hain
tere kuche men chale aa.e ijazat ke baghair
ham se puchho to ki ham kaise hain ai ham-vatano
apne yaron ke bina apni mohabbat ke baghair
mulk to mulk gharon par bhi hai qabza us ka
ab to ghar bhi nahin chalte hain siyasat ke baghair
aks kis ka ye utar aaya hai a.ine men
kaun ye dekh raha hai mujhe hairat ke baghair
hasil-e-ishq agar kuchh hai to vahshat hai ‘ziya’
aur insan mukammal nahin vahshat ke baghair
Leave a Reply