gaDe Mardon Ne Akasr Zinda Logon Ki Qayaadat Ki

Iqbal Sajid

gaḌe mardon ne akasr zinda logon ki qayadat ki

miri rahon men bhi haa.il hain divaren qadamat ki

na.i kirnen purane asman men kyuun jagah paa.en

vo kafir hai ki jis ne chaḌhte suraj ki ibadat ki

purani siḌhiyon par main na.e qadmon ko kyuun rakhun

gira.un kis liye chhat sar pe bosida imarat ki

tira ehsas bhi hoga kabhi meri tarah patthar

nikal ja.egi a.ine se parchha.in nazakat ki

vo mera but tha jis ko main ne apne haath se toḌa

ki barson ki ye mehnat ek lamhe men akarat ki

agar hai naam ki ḳhvahish to divaron pe chaspan kar

bana kar jhuuT ke rangon se tasviren sadaqat ki

abhi sinon men lahrate hain meri yaad ke parcham

abhi tak sabt hain mohren dilon par badshahat ki

abhi sab harf taaza hain mukarta kyuun hai ma.ani se

syahi ḳhushk bhi hone nahin paa.i ibarat ki

koi miThe phalon ki aas men kyuun talḳh din kaaTe

kise fursat hai ‘sajid’ aj-kal sabr-o-qana.at ki