Diwar-O-Dar the Jaan Sarae Nikal Gae

Poet

divar-o-dar the jaan sara.e nikal ga.e

is baar sa.eban se saa.e nikal ga.e

duniya musha.era hai so zaḳhmon ki daad ho

ham aa.e chand sher suna.e nikal ga.e

ham apne dil ke shauq bhala kab nikalenge

tanḳhvah men to sirf kira.e nikal ga.e

jis ne amal kiya use mahnga bahut paḌa

farigh to de ke muft men raa.e nikal ga.e

ankhen jhapak raha tha ki manzar badal gaya

kuchh rang phuljaḌi men sama.e nikal ga.e