Syed Hamid
kyuun sadgi se us ki takrar ho ga.i hai
tahzib se tabi.at bezar ho ga.i hai
nikli zaban se thi chhoTi si baat lekin
mabain do dilon ke divar ho ga.i hai
kaliyan khila rahi thi shoḳhi nasim-asa
jab tanz ban ga.i hai talvar ho ga.i hai
duniya ke mashghalon men ye ghir gaya hai aisa
ab dil se baat karni dushvar ho ga.i hai
pheri nigah mujh se jaise na jante hon
ankhon ki sa.i-e-aḳhfa iz.har ho ga.i hai
uupar tale lage hain ambar har tarah ke
nagri ye hafiza ki bazar ho ga.i hai
aa.i hai arz saari ab us ke da.ere men
taḳh.il pa-ba-jaulan pur-kar ho ga.i hai
haami bhari thi dil ne tagh.ir-e-rang dekho
jab tak labon pe aa.i inkar ho ga.i hai
Leave a Reply