badan-e-yar ki bu-bas uda laae hava
jaan aa jaae jo vaan ho ke yahan aae hava
badan-e-yar ko bas chhu ke na itrae hava
itr ki ban ke lapat mujh se lipat jaae hava
un ke kuche men ghubar apna uda kar le jaae
mujh pe ehsan kare mere bhi kaam aae hava
bandh gai baagh men teri to hava bad-e-saba
un ke kuche men miri aah ki bandh jaae hava
kyuun na ho bad-e-bahari mujhe ye farmaish
kyuun na bandhun main hava yaar jo bandhvae hava
tu mile ‘mehr’ se ai mah yahi tarikh ho sach
gulshan-o-bada-o-gul men tujhe garmae hava
Leave a Reply