Poet
ujḌe dil-o-dimagh ko abad kar sakun
aisa to kuchh kiya nahin jo yaad kar sakun
aḳhir ko aadmi huun kabhi chahta hai dil
ḳhud ko tire ḳhayal se azad kar sakun
khole zaban vo jo use janta na ho
mera to munh nahin hai ki fariyad kar sakun
ik umr kaT ga.i magar ab tak hai justuju
din kaTne ka fan koi ijad kar sakun
apne hi gham ghalat hon suḳhan se bahut hai ye
aisa hunar kahan ki ise shaad kar sakun
barbad ho ke lauTne vaala huun main ‘suhail’
aaya tha yuun ki dahr ko abad kar sakun
Leave a Reply