abdussalam-asim

Ye Man Lene Mein Aisi Bhi Kya Burai Hai

ye maan lene men aisi bhi kya burai hai

samajh men der se ik achchhi baat aai hai

diya hai tum ne ba-sad zoam intiha ka naam

jise vo marhala-e-shauq ibtidai hai

hain tujh se badh ke yahan tere saare ham-sae

mire khuda ye tiri kaisi kibriyai hai

vo jin ko kar gaya be nuur agahi ka tilism

kahan in ankhon ko phir subah raas aai hai

ba-zid hain vo bhi ki main un hi ki tarah sochun

vo jin se duur ka rishta na ashnai hai

bataun kya use ashob-e-rozgar ‘asim’

jo mere vaste vaj.h-e-ghazal-sarai hai

More Poems

Leave a Comment