apni aag men bhunti jaa.e bunti jaa.e kafan apna
goya isi liye chhoḌa hai chingari ne vatan apna
jhonke kuchh be-jan hava ke aate hain apne-ap chale
jhuum uThte hain chaman ke pankhe us ko jaan ke fan apna
ḳhud-rav sabze chheḌ rahe hain jangal ke qanun ke raag
kab tak baagh men paḌhva.enge ḳhutba sarv-o-saman apna
dariya-dil hai sahil mera magar yahan har sail-e-bala
saa.il hai ki baḌha aata hai phaila.e daman apna
mil to jaa.e apne bhanvar ko dariya ke chakkar se najat
lekin aah agar rah ja.un ho kar main hama-tan apna
sham.a ki lau kya shauq-e-baqa men sham.a ko chaTe jaati hai
ḳhud ko tarasti rah jaati hai ruuh miTa ke badan apna
koi ‘muhib’ azurda kyuun ho meri talḳh-kalami se
apni hi janib rahta hai akasr ru-e-suḳhan apna
Leave a Reply