aisa ye dard hai ki bhulaya na ja.ega
me.ar-e-ishq un se baḌhaya na ja.ega
is baar un se kah do qadam soch kar rakhen
ujḌa jo phir ye shahr basaya na ja.ega
jo log bughz dil men chhupa.e hain aaj bhi
un se mire makan men aaya na ja.ega
haq baat bolne se kiya jis kisi ne ḳhauf
mahfil men phir kabhi bhi bulaya na ja.ega
the muttafiq to baat se meri sabhi magar
sheva mira ḳhayal banaya na ja.ega
shayad isi liye nahin aa.e vo mere paas
jo aa ga.e to chhoḌ ke jaaya na ja.ega
gar ehtiram kar na sake bazm-e-naz ka
sharmindagi se sar ko uThaya na ja.ega
zahr-ab mere vaste vo le to aa.ega
saaqi se jaam ham ko pilaya na ja.ega
‘asra’ bana lo shauq ko apne junun ki aag
ik baar bujh ga.i to jalaya na ja.ega
Leave a Reply