Krishn Bihari Noor
ye lamha ziist ka hai bas aḳhiri hai aur main huun
har ek samt se ab vapsi hai aur main huun
hayat jaise Thahar si ga.i ho ye hi nahin
tamam biiti hui zindagi hai aur main huun
main apne jism se bahar huun aur hosh bhi hai
zamin pe samne ik ajnabi hai aur main huun
vo koi ḳhvab ho chahe ḳhayal ya sach ho
faza men uḌti hui chandni hai aur main huun
kisi maqam pe rukne ko ji nahin karta
ajiib pyaas ajab tishnagi hai aur main huun
akela ishq hai hijr-o-visal kuchh bhi nahin
bas ek alam-e-divangi hai aur main huun
na lafz hai na sada phir bhi kya nahin vazeh
kalam karti hui ḳhamushi hai aur main huun
surur-o-kaif ka aalam hadon ko chhuta hua
ḳhudi ka nashsha hai kuchh agahi hai aur main huun
muqabil apne koi hai zarur kaun hai vo
bisat-e-dahr hai baazi bichhi hai aur main huun
jahan na sukh ka hai ehsas aur na dukh ki kasak
usi maqam pe ab sha.iri hai aur main huun
mire vajud ko apne men jazb karti hui
na.i na.i si koi raushni hai aur main huun
jo chand lamhon men guzra bata diya sab kuchh
phir us ke ba.ad vahi zindagi hai aur main huun
Leave a Reply