maraz-e-ishq men mujh sa bhi giraftar na ho
dost to dost hai dushman ko ye azar na ho
hosh se kaam lo anjam ko dekho muusa
tuur ki ḳhair nahin talib-e-didar na ho
ye bhi ehsan hai agar haath sitam se khincho
na karo mehr-o-vafa dar-pa-e-azar na ho
fatiha qabr pe aa.e ho to paḌhte jaao
tab-e-nazuk pe agar lutf-o-karam baar na ho
dil-e-insaf-talab gher ke laaya hai jahan
ya-ilahi ye kahin husn ki sarkar na ho
jurm vo jurm hai jo jurm ki had men na rahe
ma.asiyat ka hai maza jab ki gunahgar na ho
lutf jiine ka na marne ka maza milta hai
hon maraz laakh magar ishq ka azar na ho
haa.e jan-bazon ki mahrumi-e-qismat ‘mas.ud’
ma.arke men jo kisi haath men talvar na ho
Leave a Reply