Rakhshanda Naved
kaise niklun ḳhumar se bahar
bazuon ke hisar se bahar
dard nikla hai sabr ki had se
ashk nikle qatar se bahar
chand lamhon ki muḳhtasar qurbat
aur yaden shumar se bahar
is liye us ki yaad men gum huun
bhulna iḳhtiyar se bahar
aur jaa.en kahan mah o anjum
roz-o-shab ke madar se bahar
tifl-e-dil phir udaas baiTha hai
koi le jaa.e pyaar se bahar
koi ‘raḳhshanda’ milne aaya hai
chal chalen intizar se bahar
Leave a Reply