tadfin
chaar taraf sannate ki divaren hain
aur markaz men ik taaza taaza qabr khudi hai
koi janaza aane vaala hai
kuchh aur nahin to aaj shahadat ka kalma sunne ko milega
kanon ke ik sadi purane qufl khulenge
aaj miri qallash samaat ko avaz ki daulat arzani hogi
divaron ke saae men ik bahut bada amboh numayan hota hai
jo ahista ahista qabr ki janib aata hai
in logon ke qadmon ki koi chaap nahin hai
lab hilte hain lekin harf sada banne se pahle mar jaate hain
ankhon se aansu jaari hain
lekin aansu to vaise bhi
dil o dimagh ke sannaton ki timsalen hote hain
mayyat qabr men utri hai
aur hadd-e-nazar tak log bilakte hue dikhai dete hain
aur sirf dikhai dete hain
aur kaan dharo to sannate hi sunai dete hain
jab qabr mukammal ho jaati hai
ik budha jo ”vaqt” nazar aata hai apne huliye se
hathon men uthae katba qabr pe jhukta hai
jab uthta hai to katbe ka har harf garajne lagta hai
ye lauh-e-mazar ”avaz” ki hai!
Leave a Reply