Jazba-O-Ehsas Ki Shiddat Ka Andaza Hua

Muslim Shameem

jazba-o-ehsas ki shiddat ka andaza hua

har nafas har saans men chahat ka andaza hua

ḳhvab chehra sard lab ankhon men chingari ki rut

vaqt-e-ruḳhsat dil ki kaifiyyat ka andaza hua

hijr ka mausam jab aa.e vasl ki ḳhushbu khule

faslon ke darmiyan qurbat ka andaza hua

qatra-e-shabnam men dekhun sho.alagi ka madd-o-jazr

sub.h se hi shaam ki surat ka andaza hua

dekh kar atish-ba-jan kuchh muztarib vo bhi hue

un se mil kar dard ki daulat ka andaza hua