su-e-kaaba ya su-e-ku-e-butan le jaega
sach bata josh-e-junun mujh ko kahan le jaega
jaenge mulk-e-adam ko din-o-iman chhod kar
sar pe apne kaun ye bar-e-garan le jaega
hai yaqin us dil ke hathon jaan ek din jaegi
khinch kar maqtal men bahr-e-imtihan le jaega
khud irada but-kada ka hai na kaaba ki havas
jaenge vaaiz jahan pir-e-mughan le jaega
chhod kar bismil gaya be-rahm ye samjha na haae
dil men arman-e-shahadat nim-jan le jaega
ku-e-janan bhi na chhoda khana-virani ke baad
dekhna hai ab kahan ye asman le jaega
aae the ‘aughat’ jahan men thokaren khane ko ham
jaenge ye ab-o-dana ab jahan le jaega