Hasan Shahnawaz Zaidi
mez pe chehra zulfen kaghaz par
dekh raha hai hairat se daftar
chehre par shikva karti ankhen
ankhon men aadha ḳhali saghar
gaal pe tiin lakiren aansu ki
kanon men hiire ke do kankar
baton men mausiqi jaisi taal
saḌhe saat aur pandrah ka chakkar
ab to ghar se bahar jaane do
chipak gaya hai khiḌki par manzar
uryani ki baat nahin is men
phulon ko daman ki kahan ḳhabar
afsana to nahin hayat miri
ek ghazal thi jis ka pair na sar
is ummid men ghaas pe leTa huun
koi sitara dega teri ḳhabar
apne paap to dho Daale ham ne
kaise dho.en paani ki chadar
ḳhvabon men shatranj ke chau-ḳhane
bina zor ke paidal jaa.e kidhar
jab dekha ki ḳhair nahin milni
chhoḌ diya ummid ne mera dar
kar-e-duniya se kya paana hai
ret bhari hai miTTi ke andar
kaaTa to donon mar ja.enge
juḌe hue bachche hain ḳhair aur shar
Leave a Reply