na qahqaha na tabassum na ashk paiham hai
jahan pe ham hain vahan kuchh ajiib aalam hai
jo pahle aaj se tha aaj bhi vahi gham hai
ye daur-e-jam nahin hai fareb-e-paiham hai
bura na maano to ik baat tum se arz karun
tumhara lutf ba-andaza-e-sitam kam hai
ye sub.h-o-sham ki masti ye nashsha-e-shab-o-roz
tire baghair koi kaif ho mujhe sam hai
sar-e-niyaz kabhi us ke samne na jhuka
isi qusur pe ham se zamana barham hai
hai baat baat pe hajv-e-subu-o-saghar-o-mai
janab-e-hazrat-e-va.is se naak men dam hai
nigah-e-naz ko taklif-e-iltifat na do
ki ab to zaḳhm-e-jigar be-niyaz-e-marham hai
ḳhata zarur koi us se bhi hui hogi
ki aḳhir ‘asi’-e-ḳhasta bhi ibn-e-adam hai
Leave a Reply