Hain Tegh-E-Naz-E-Yar Ke Bismil Alag Alag

Poet

hain tegh-e-naz-e-yar ke bismil alag alag

siine men hain tapan jigar-o-dil alag alag

qatil to rashk dekh zara apne kushton ka

maqtal men bhi taḌapte hain bismil alag alag

kya intizam hai mire laila-jamal ka

majnun ravan hain sab pas-e-mahmil alag alag

dekho bashar men san.at-e-ḳhallaq-e-rozgar

sab ek hain magar hai shama.il alag alag

farmate hain milap ka karta huun jab saval

tu baat karne ke nahin qabil alag alag

ik shefta hai zulf ka ik mubtala-e-ruḳh

hain shaiḳh-o-barahman tire qaa.il alag alag

mere tumhare bulbul-o-gul munh chaḌhenge kya

donon ko kar chuka huun main qaa.il alag alag

makr-o-nifaq ishq se muddat talak raha

main dil se aur mujh se mira dil alag alag

ta ho tamiz lazzat-e-badam-o-shahd men

boson ka chashm-o-lab ke huun saa.il alag alag

kis kis ko duun main saḳht musibat men jaan hai

ruḳhsar-o-zulf mangte hain dil alag alag

kya mehr-o-mah kya gul-o-shamshad aa.ina

sab ho chuke hain tere muqabil alag alag

yakta tu vo hai momin-o-kafir yahud-o-gabr

vahdat ke tere sab hain ye qaa.il alag alag

pa-e-nigah-e-ahl-e-nazar ke paḌe hain niil

ruḳhsar-e-naznin pe nahin til alag alag

aage to saath rahte the ham haala saan par ab

rahta hai ham se vo mah-e-kamil alag alag

andaz-o-naz-o-ghamza-o-shoḳhi-o-kajravi

hain ek mere dam ke ye qatil alag alag

qabze pe haath rakh ke ‘qalaq’ ne mila.i aankh

kal har raqib se sar-e-mahfil alag alag