fikr yahi hai har ghadi gham yahi subh o shaam hai
gar na mila vo kuchh dinon kaam yahan tamam hai
ab hain hamare naam par saikdon galiyan ye lutf
kahte the tum miyan miyan vo hi to ye ghulam hai
khair na miliye roz roz yunhi sahi kabhi kabhi
us se bhi inhiraf hai is men bhi kuchh kalam hai
ai dil-e-be-qarar kuchh kar vo ruke to rukne de
faeda iztirab se sabr ka ye maqam hai
koi kahe bura bhala koi adu ho ya ho dost
aur kisi se kaam kya aap se mujh ko kaam hai
haae har ik ki vo sune kuchh main kahun to ye kahe
aap na mujh se kuchh kahen aap se kab kalam hai
aaj hain ham to jan-ba-lab kal ko gar aae bhi husul
tum ko kisi se kya gharaz apni khushi se kaam hai
ye bhi ghazab ka rashk hai khat to hai nam-e-ghair par
aur lifafe par likha sahv se mera naam hai
kis ko kya shahid-e-naz kis ki hui vafa pasand
kahte hain un ke dar par aaj khalq ka azhdaham hai
ab hain fareb kis liye hoga yaqin kisi ko ab
tum se vafa ki aarzu ye bhi khayal-e-kham hai
tauba ka yaan kise khayal mai ko samajhte hain halal
jis ke liye haram hai us ke liye haram hai
din ho to afaten ye kuchh raat ho to ye kuchh sitam
kaisi hamari subh hai kaisi hamari shaam hai
hijr ke vo sitam sahe ab na rahi hava-e-vasl
haal yahi hai nama-bar ye hi mira payam hai
sun ke miri fughan ka shor puchha kisi ne kaun hai
bole suna na hoga kyaa, ye to vahi ‘nizam’ hai
Leave a Reply