lutf pahchan ka bhi to lo ajnabi
ham se mil mil ke yuun na bano ajnabi
ajnabi-pan hai sheva mire shahr ka
aa.e ho jo yahan ban raho ajnabi
bhiiḌ hi se muḳhatab ho tum der se
ḳhud se bhi to kabhi kuchh kaho ajnabi
sah na paoge majlis ki tanha.iyan
is se behtar hai tanha raho ajnabi
TuTna hi hababon ki taqdir hai
in marasim ko itna na ro ajnabi
ham shanasa.iyon ke bharam men jiye
khul na paaya ki aḳhir hain do ajnabi
zindagi hai ki basti kisi ghair ki
tum shanasa sahi phir bhi ho ajnabi
Leave a Reply