tujhe hai shauq-e-zaban par jo qand rakhne ka
de iḳhtiyar mujhe bhi pasand rakhne ka
pukarti hain mire dil ki pastiyan mujh ko
yahi to vaqt hai rutba buland rakhne ka
isi jihad men guzri hai zindagi apni
kiya hai roz irada samand rakhne ka
buland meḳh se ḳhvabon ki rassiyan bandho
diya hai raat ne mauqa kamand rakhne ka
hamin se husn ko hai aas daad paane ki
hamin ko hukm hai ankhon ko band rakhne ka
sabhi ghamon ka uThata huun ḳharch men ‘rahat’
ajab sila hai dil-e-dard-mand rakhne ka
Leave a Reply