furqat ki aafat bure din katna saal hai
ye haath hai so kare ye siina ghadiyal hai
rota huun sham-o-sahar tukde hai gham se jigar
bedard kuchh rahm kar mera bura haal hai
bechain kahan dil-e-saman yaqub ka hai maqal
jins-e-vafa ka hai kaal kanan men hat-tal hai
resham ke lachchhe hain baal makhmal ke tukde hain gaal
hai ye nazakat ka haal patli kamar baal hai
ashiq bache ta-ba ki kaali bala hai ye shai
kakul ka jo halqa hai muuzi ka changal hai
kyuun aae ham ai pari halchal men hai zindagi
aafat hai tere gale andhi hai bhaunchal hai
phulon men rangat na bu sabze ko kuuda kaho
pa-e-khizan qata ho gulzar paemal hai
dil nazar jis ne kiya thukra ke us ne kaha
leti hai meri bala dargor kya maal hai
har-dam na dekh us ke baal sar par na le ye vabal
ji ko bala men na daal ai dil ye janjal hai
raftar kahiye use dil har qadam par pise
puchhe koi kabk se sadqe ajab chaal hai
kya kahiye kya gham saha din-rat rota raha
dil khuun ho kar baha rangin rumal hai
ushshaq ka hai ye haal din-rat hai hal-e-qal
ah-o-fughan hai khayal-e-sina-zani taal hai
saut jafa-kesh hai ashiq jigar-resh hai
abru hai ya niish hai bichchhu hai ya khaal hai
hai kuchh na kuchh to ba-jog nahaq nahin hai ye birog
kaisa laga ji ko rog ai ‘bahr’ kya haal hai
Leave a Reply