ghamon men kuchh kami ya kuchh izafa kar rahe hain
samajh men kuchh nahin aata ki ham kya kar rahe hain
jo aata hai nazar men us ko le aate hain dil men
na.i tarkib se ham ḳhud ko tanha kar rahe hain
nazar karte hain yuun jaise bichhaḌne ki ghaḌi ho
suḳhan karte hain aise jaise girya kar rahe hain
tumhare hi ta.alluq se to ham hain is badan men
tumhare hi liye to ye tamasha kar rahe hain
zaval-e-amadgi ab gunjti hai dhaḌkanon men
so dil se ḳhvahishon ka bojh halka kar rahe hain
suḳhan tum se ho ya ahbab se ya apne dil se
yahi lagta hai ham har baat beja kar rahe hain
tumhari aarzu hone se pahle bhi to ham the
so jaise ban paḌe ab bhi guzara kar rahe hain
zara puchhe koi ma.adum hote in dukhon se
hamen kis ke bharose par akela kar rahe hain
hamen roke hue hai pas-e-namus-e-mohabbat
ye mat samjho ki ham duniya ki parva kar rahe hain
ba-juz-sina-ḳharashi kuchh nahin aata hai lekin
zara dekho to ham ye kaam kaisa kar rahe hain
hamen is kaam ki mushkil ka andaza hai sahab
baḌe arse se ham bhi tark-e-duniya kar rahe hain
jo hogi sub.h to taqsim ho ja.enge phir ham
Dhali hai shaam to ḳhud ko ikaTTha kar rahe hain
junun se itna derina ta.alluq toḌ denge?
are tauba karen ‘irfan’, ye kya kar rahe hain
Leave a Reply