dard men shiddat-e-ehsas nahin thi pahle
zindagi raam ka ban-bas nahin thi pahle
ham bhi sau jaate the ma.asum farishton ki tarah
aur ye raat bhi hassas nahin thi pahle
ham ne is baar tujhe jism se haT kar socha
sha.iri ruuh ki akkas nahin thi pahle
teri furqat hi udasi ka sabab hai ab ke
teri qurbat bhi hamen raas nahin thi pahle
teri ankhon ne kahin ka nahin rakha ham ko
itni shiddat ki hamen pyaas nahin thi pahle
raah chalte hue ham muḌ ke nahin dekhte the
raste men tiri bu-bas nahin thi pahle
Leave a Reply