Poet
kar-e-ḳhair itna to ai laghzish-e-pa ho jaata
paa.e saaqi pe hi ik sajda ada ho jaata
vo to ye kahiye ki majbur hai nazm-e-hasti
varna har banda-e-maghrur ḳhuda ho jaata
qafile vaale the mahrum-e-basirat varna
mera har naqsh-e-qadam rah-numa ho jaata
gham ke maron pe bhi ai davar-e-hashr ek nazar
aaj to faisla-e-ahal-e-vafa ho jaata
yuun andheron men bhaTakte na kabhi ahl-e-ḳhirad
koi divana agar rah-numa ho jaata
dil tiri nim-nigahi ka to mamnun sahi
dard abhi kam hai zara aur siva ho jaata
lazzat-e-gham se hai zid fitrat-e-gham ko shayad
dard hi dard na kyuun dard dava ho jaata
sun ke bhar aata agar un ka bhi dil ai ‘ejaz’
qissa-e-dard ka unvan naya ho jaata
Leave a Reply