jab sub.h ki dahliz pe bazar lagega
har manzar-e-shab ḳhvab ki divar lagega
pal bhar men bikhar jaenge yadon ke zaḳhire
jab zehn pe ik sang-e-giran-bar lagega
gundhe hain nai shab ne sitaron ke nae haar
kab ghar mira aina-e-anvar lagega
gar sail-e-ḳhurafat men bah jaaen ye ankhen
har harf-e-yaqin kalma-e-inkar lagega
halat na badle to tamanna ki zamin par
TuuTi hui ummidon ka ambar lagega
khilte rahe gar phuul lahu men yunhi ‘akbar’
har fasl men dil apna saman-zar lagega