dil mira tir-e-sitamgar ka nishana ho gaya
afat-e-jan mere haq men dil lagana ho gaya
ho gaya laghar jo us laila-ada ke ishq men
misl-e-majnun haal mera bhi fasana ho gaya
khaksari ne dikhaya baad murdan bhi uruuj
asman turbat par mere shamiyana ho gaya
khvab-e-ghaflat se zara dekho to kab chaunke hain ham
qafila mulk-e-adam ko jab ravana ho gaya
fasl-e-gul men bhi rihai ki na kuchh surat hui
qaid men sayyad mujh ko ik zamana ho gaya
dil jalaya surat-e-parvana jab se ishq men
farz tab se shama par aansu bahana ho gaya
aaj tak ai dil javab-e-khat na bheja yaar ne
nama-bar ko bhi gae kitna zamana ho gaya
pas-e-rusvai se dekho paas aa sakte nahin
raat aai niind ka tum ko bahana ho gaya
ho pareshani sar-e-mu bhi na zulf-e-yar ko
is liye mera dil-e-sad-chak shana ho gaya
baad murdan kaun aata hai khabar ko ai ‘rasa’
khatm bas kunj-e-lahad tak dostana ho gaya
Leave a Reply