chak-e-daman na raha chak-e-gareban na raha
phir bhi poshida mira hal-e-pareshan na raha
bazm-e-dushman na kabhi darham-o-barham dekhi
kya tira daur vo ai gardish-e-dauran na raha
mujh ko afsos ki vo aur adu ke bas men
us ko ye gham ki mira ab koi pursan na raha
ham ne jo baat kahi thi vahi aḳhir ko hui
tum ne jo raaz chhupaya tha vo pinhan na raha
munfa.il tark-e-vafa ne mujhe barson rakkha
chaar din apne kiye par vo pasheman na raha
un ki shoḳhi bhi hui hai miri vahshat ka javab
haath Daala jo gareban men gareban na raha
ban ga.i daagh kaleje ka tamanna-e-visal
dagh-e-hasrat ke siva ab koi arman na raha
ḳhair sab qaul-o-qasam jhuuT sahi ḳhush rahiye
ab mire aap ke vo ahd vo paiman na raha
rokne ko mujhe ghairat ke siva is dar par
koi darban na raha koi nigahban na raha
miT gaya shaghl-e-junun ab vo kahan jama-dari
zor vahshat ka bhi ab dast-o-gareban na raha
chaar jhiḌki men tire dar se alag ho baiTha
ghair kuchh roz bhi minnat-kash-e-darban na raha
vaqt ko haath se kho kar koi duniya men ‘hafiz’
umr-bhar meri tarah sar-ba-gareban na raha
Leave a Reply