dard ke chand ki tasvir ghazal men aa.e
sher likkhun to ye tasir ghazal men aa.e
sunte aa.e hain bahut zikr hasin ḳhvabon ka
ab kisi ḳhvab ki ta.abir ghazal men aa.e
un ke chehre ko main is tarah paḌha karta huun
jaise gham ki koi tafsir ghazal men aa.e
khet khaliyan se jab sanvli surat lauTe
surma.i shaam ki tanvir ghazal men aa.e
apne kirdar ka kuchh aks to jhalke ‘anjum’
aa.ine ki koi tahrir ghazal men aa.e
Leave a Reply