vo aur honge jo vahm-o-guman ke saath chale
ham apni raah pe azm-e-javan ke saath chale
talash-e-yar men ham har maqam se guzre
kabhi zamin kabhi asman ke saath chale
na jaane kitni hi sadiyon ke fasle hain abhi
hui hai umr zaman-o-makan ke saath chale
kabhi to pa.enge ham bhi hayat ki manzil
isi ḳhayal se umr-e-ravan ke saath chale
tamam raat kisi ajnabi ka saath raha
sahar hui to dil-e-bad-guman ke saath chale
jo phuul ban ke mahakte the rahguzaron men
ghubar ban ke tire karvan ke saath chale
vo husn-o-ishq ke qisse hain jin se vabasta
unhi ka zikr miri dastan ke saath chale
junun ke dosh pe rakh kar charagh-e-hasti ham
qaza ko DhunDne mauj-e-ravan ke saath chale
usi ko kahte hain shayad nasib ki gardish
bahar aa.e to sho.ala ḳhizan ke saath chale
Leave a Reply