Ashfaq Husain
vo tanha tha to phir tanha.i ka dam-saz hona tha
un ankhon ke liye mujh ko sitara-saz hona tha
sabhi ḳhamosh the avaz par us ki so aise men
mujhe chup to nahin rahna tha ham-avaz hona tha
jo dil men tha vo ik viran gumbad hi men kah deta
ye mera ahd tha mujh ko asar-andaz hona tha
mire lab par zamane ki shikayat kis liye aa.i
agar ye shor tha to us ko be-avaz hona tha
na jaane mujh se kitne log the jo sochte ye the
ki in se ik na.i tariḳh ka aghaz hona tha
jahan zaḳhmi tamannaon ki sarhad ḳhatm hoti thi
vahan se ik na.i ummid ka aghaz hona tha
ye kar-e-ishq tha ‘ashfaq’ mujh se ho nahin paaya
mujhe bhi sha.iri men sahib-e-ejaz hona tha
Leave a Reply