Poet
miri zindagi bhi tu hai mira mudda.a bhi tu hai
main tujhi ko chahta huun tu hi meri aarzu hai
kise DhunDhti hain har-su miri be-qarar nazren
tu ye ḳhuub janta hai mujhe kis ki justuju hai
miri chashm-e-husn hi men tire ruḳh ki tabishen hain
mire halqa-e-nazar men tiri zulf-e-mushk-bu hai
jo karam pe tum ho maa.il to ye shaan hai tumhari
na saval kyuun karun main ki saval meri ḳhu hai
miri ruuh ḳhush hai ‘muztar’ ki miri talab hai sadiq
jo nazar se chhup raha tha vahi aaj ru-ba-ru hai
Leave a Reply