Ek Karb-e-Musalsal Ki Saza Den To Kise Den

ik karb-e-musalsal ki saza den to kise den

maqtal men hain jiine ki dua den to kise den

patthar hain sabhi log karen baat to kis se

is shahr-e-khamoshan men sada den to kise den

hai kaun ki jo khud ko hi jalta hua dekhe

sab haath hain kaghaz ke diya den to kise den

sab log savali hain sabhi jism barahna

aur paas hai bas ek rida den to kise den

jab haath hi kat jaaen to thamega bhala kaun

ye soch rahe hain ki asa den to kise den

bazar men khushbu ke kharidar kahan hain

ye phuul hain be-rang bata den to kise den

chup rahne ki har shakhs qasam khaae hue hai

ham zahr bhara jaam bhala den to kise den

Leave a Comment