ḳhushi se ranj ka badla yahan nahin milta
vo mil ga.e to mujhe asman nahin milta
hazar DhunDiye us ka nishan nahin milta
jabin mile to mile astan nahin milta
majaz aur haqiqat kuchh aur hai yaani
tiri nigah se tera bayan nahin milta
bhaḌak ke shola-e-gul tu hi ab laga de aag
ki bijliyon ko mira ashiyan nahin milta
tiri talash kafi-ul-jumla ma-hasal ye hai
ki tu yahan nahin milta vahan nahin milta
bata ab ai jaras-e-daur main kidhar ja.un
nishan-e-gard-e-rah-e-karvan nahin milta
mujhe bula ke yahan aap chhup gaya koi
vo mehman huun jise mezban nahin milta
tujhe ḳhabar hai tire tir-e-be-panah ki ḳhair
bahut dinon se dil-e-na-tavan nahin milta
kisi ne tujh ko na jaana magar ye kam jaana
ye raaz hai ki koi raz-dan nahin milta
mujhe aziiz sahi qadr-e-dil tumhen kyuun ho
kami to dil ki nahin dil kahan nahin milta
dayar-e-umr men ab qahat-e-mehr hai ‘fani’
koi ajal ke siva mehrban nahin milta
Leave a Reply