Dattatriya Kaifi
qais ka tujh men junun jazba-e-mansur nahin
varna manzil-gah-e-dildar to kuchh duur nahin
koh-o-vadi vahi bijli vahi be-hoshi bhi
jalva lekin vo dil-afroz sar-e-tur nahin
DhunDne ja.un kise ja.un to main ja.un kahan
dil ke jo paas hai vo aankh bhi kuchh duur nahin
pher men zat-o-sifat ke na sarasima ho
nahin ma.alum ki jauhar se araz duur nahin
nazar aata nahin tujh ko to hai ankhon ka qusur
aks se shaḳhs haqiqat men zara duur nahin
jalva-saman hai rah-e-ishq men zarra zarra
sahab-e-zauq-e-nazar muntazir-e-tur nahin
amr-e-haq harf-e-azal hai to ye fatve kaise
vo na.i baat nahin main koi mansur nahin
jhuuT sach us ko hai yaksan vo hai apni dhun ka
haq-shanasi mire naqqad ka dastur nahin
kibr hi se to azazil hai shaitan-e-rajim
aadmi hai vahi insan jo maghrur nahin
kya tamasha hai liye jaate hain taqdir ka naam
aur tadbir se ik lahza bhi ma.azur nahin
nahin taqdir ki tahrir se inkar magar
is men tadbir muqaddar hai jo mazkur nahin
aap taqdir sudhar ja.egi tadbir to kar
kaun kahta hai ki insan ko maqdur nahin
tu avariz se avariz ki hai tujh se parvaz
tu jo mutlaq nahin muḳhtar to majbur nahin
zarre zarre ko hai ik farz vadi.at haq se
na samajh to koi qaisar nahin faghfur nahin
kar-gah-e-amal is dahr ko vo samjhe hain
gul-o-bulbul ke karishmon se jo matur nahin
kal main mil-jul ke rahe juz ka usi men hai vaqar
fard nachiz hai gar shamil-e-jamhur nahin
kyuun khiche rahte hain ye shaiḳh-o-barahman baham
dair ka.aba se jo haq par ho nazar duur nahin
adab-o-sher ka aalim hai vo vahdat-e-a.in
ki jahan kafir-o-din-dar ka mazkur nahin
had-e-jughrafiya se sher ki duniya hai juda
duur kilas se do gaz bhi yahan tuur nahin
kaif baaqi hai vo is men ki nahin jis ko ḳhumar
bada-e-sher koi bada-e-a.agur nahin
saqi-e-mast-nazar hai ye fusun ya e.ajaz
sab ko mad.hosh kiya aap to maḳhmur nahin
saghar ik aur bhi de pir-e-mughan ‘kaifi’ ko
nashsha-e-be-ḳhudi-e-ishq men vo chuur nahin
Leave a Reply