Mohsin Bhopali
abhi kuchh aur bhi gard-o-ghubar ubhrega
phir is ke ba.ad mira shah-savar ubhrega
safina Duuba nahin hai nazar se ojhal hai
mujhe yaqin hai phir ek baar ubhrega
paḌi bhi rahne do maazi pe maslahat ki raakh
kuredne se faqat intishar ubhrega
hamare ahd men shart-e-shanavari hai yahi
hai Dubne pe jise iḳhtiyar ubhrega
shab-e-siyah ka muqaddar shikast hai ‘mohsin’
dar-e-ufuq se phir anjum-shikar ubhrega
Leave a Reply